DC NJOMBE AONGOZA ZOEZI LA UPANDAJI MITI NA KUPIGA MARUFUKU UENDELEZAJI VYANZO VYA MAJI

Tarehe iliyowekwa: June 5th, 2022

Mkuu wa Wilaya ya Njombe Mheshimiwa Kissa Gwakisa Kasongwa leo ameongoza Wananchi na Watumishi wa Mkoa wa Njombe katika zoezi la upandaji miti aina ya mivengi kwenye eneo oevu la Nyikamtwe  Mtaa wa Lunywanywi  wakati wa maadhimisho ya siku ya mazingira dunia ambapo huadhimishwa kila tarehe  5 mwezi Juni.

Akizungumza wakati wa maadhimisho hayo yenye kauli mbiu “TANZANIA NI MOJA TU, TUNZA MAZINGIRA"  Mkuu wa Wilaya ya Njombe Kissa Gwakisa  akimwakilisha Mkuu wa Mkoa wa Njombe amesema kuwa Mkoa wa Njombe ni miongoni mwa Mikoa iliyobarikiwa kuwa na vyanzo vingi vya maji ambavyo idadi yake inakadiriwa kuwa 4436 ambapo vyanzo hivyo vinahitaji kuendelezwa na kutunzwa kwa kupanda miti rafiki na maji ili kuendeleza uhifadhi wa mazingira katika maeneo hayo.

Kissa amesema kuwa, Uwepo wa vyanzo hivi vya maji unamanufaa makubwa sio kwa Mkoa wa Njombe Pekee tu bali hata kwa Nchi nzima kwani vyanzo hivi vitakwenda kupunguza changamoto kubwa ya maji na pia kuendeleza uhifadhi wa mazingira katika maeneo yetu. Tukumbuke kuwa Mkoa wa Njombe ni miongoni Mikoa yenye vyanzo vikubwa nchi vya maji na ambavyo vinatarajiwa kuchangia kwa kiasi kikubwa katika kufanikisha uwepo wa maji katika bwawa la Mwalimu Nyerere ambalo litakwenda kutumika katika uzalishaji wa umeme kwa ajili ya manufaa yetu.

Katika hatua nyingine Mheshimiwa Kissa amepiga marufuku Wananchi kuendeleza shughuli zozote za kibinadamu katika  maeneo ya vyanzo vya maji ili kuendeleza kutunza rasilimali hizo muhimu.

Kwa upande wake Katibu Tawala Mkoa wa Njombe Bi. Judica Omary amesema kuwa zoezi la upandaji wa miti hiyo rafiki wa mazingira  unafanyika ili kuongeza uimarishaji wa uhifadhi wa mazingira katika bonde la Nyikamtwe.

Wakizungumza kwa nyakati tofauti tofauti, Diwani wa Kata ya Mjimwema Nestory Mahenge na Mwenyekiti wa  Mtaa huo wa Lunyanywi Laurent Lupenza wamesema kuwa ni faraja kubwa kwa tukio hilo la upandaji miti kufanyika katika eneo hilo kwani itasaidi eneo hilo kuendelea kuwa katika hali yake ya asili lakini pia wameahidi kuendelea kutoa elimu kwa jamii inayozunguka eneo hilo na Wananchi wa Mtaa huo kutunza na kuhifadhi eneo hilo muhimu.

Maadhimisho ya siku ya mazingira duniania huadhimishwa kwa Viongozi na Wananchi kushiriki katika shughuli mbalimbali za uhifadhi wa mazingira lengo ikiwa ni kuvilinda vyanzo mbalimbali vya maji na kuvinusuru juu ya uharibifu unaofanywa na shughuli mbalimbali za Kibinadamu.