CRDB Njombe Yakabidhi Vifaa kupambana na CORONA

Tarehe iliyowekwa: March 27th, 2020

Benki ya CRDB kupitia Kanda ya Nyanda za juu kusini imekabidhi ndoo 14 na vitakasa mikono 14 kwa Halmashauri ya Mji Njombe lengo ikiwa ni kuunga mkono jitihada za Serikali kupambana na maambukizi ya virusi vya CORONA.

Akizungumza wakati wa makabidhiano hayo Meneja wa CRDB Kanda Denis Mulekwa na Meneja wa CRDB Tawi la Njombe Amin Mwakangata wamesema kuwa Benki hiyo imeona ni vyema kuendelea kuwakinga Wananchi dhidi ya maambukizi ya virusi vya CORONA kwani ili kuweza kushiriki katika shughuli kiuchumi yampasa mtu kuwa na afya njema.

“Tumepata elimu kuwa moja kati ya njia inayoweza kutumiwa kujikinga na virusi vya CORONA ni kunawa mikono na kuitakasa. Tumetoa ndoo na vitakasa mikono vitakavyowezesha Wananchi kuweza kunawa katika maeneo yatakayoonekana kuwa na uhitaji mkubwa. Sisi kama Benki tunaamini ili tuweze kushiriki vyema katika shughuli za Kiuchumi tunahitaji watu wenye afya njema na ndio maana tumeamua hivi.”Alisema Amin Meneja CRDB Njombe.

Akizungumza mara baada ya kupokea vifaa hivyo Mganga Mkuu wa Halmashauri ya Mji Njombe Daktari Yesaya Mwasubila amesema kuwa wanaishukuru Benki ya CRDB kwa kuunga mkono jitihada za Halmashauri dhidi ya mapambano ya Ugonjwa wa CORONA na Vifaa hivyo watavipeleka katika maeneo ambayo yanaonekana kuwa na mwingiliano wa watu wengi yakiwemo maeneo ya Hospitali, Stendi na Sokoni.

Jitihada ambazo zimekuwa zikioneshwa na Halmashauri ya Mji Njombe katika mapambano dhidi ya CORONA ni sambamba na kuendelea kutoa elimu ya kujikinga kuhamasisha jamii kutumia maji tiririka na kwa wafanyabiashara kuweka vifaa vya kunawa mikono na kufanya utambuzi wa wageni wanaoingia katika Hoteli ili kujua taarifa zao kabla ya kuendelea na shughuli zozote katika Mji huo.