Elimu ya utunzaji wa maua na matunda ya parachichi yatolewa kwa wakulima Njombe TC.

Tarehe iliyowekwa: June 9th, 2023

Wakulima wa zao la Parachichi Halmashauri ya Mji Njombe wamepatiwa mafunzo ya namna ya utunzaji Wa maua na matunda ya parachichi.

Elimu Hiyo imetolewa kwa wakulima Juni 09,2023 na Idara ya kilimo, mifugo na uvuvi kwakushirikiana na Chama Cha Kijamii cha  Wadau Wa Parachichi Tanzania (ASTA)ili kuwawezesha wakulima  Wa zao la parachichi kupata tija kwa  kuhudumia mashamba Yao kitaalamu.

Mkurugenzi  Wa Halmashauri ya Mji Njombe Kuruthumu Sadick akizungumza  wakati wa ufunguzi wa mafunzo hayo, Amewapongeza wakulima hao,wengi wao wakiwa ni vijana huku  akiwatia moyo kuendelea na kilimo cha zao  la parachichi

Amesema Kuna fursa nyingi Sana kwenye kilimo  hususani cha parachichi kwa mkoa wa Njombe akiwasihi vijana kutokata tamaa na kufikiria  kuwa na mashamba yao binafsi ili wanufaike moja kwa moja na kilimo hicho.

"Ninafurahishwa Sana kuona vijana wengi, niwatie moyo msikate tamaa fanyeni jitahada hata kama mnatumika kwenye mashamba ya wengine muweze Kuwa na mashamba yenu"

Aidha amewasihi  washiriki wote kuzingatia mafunzo hayo katika kuhudumia mashamba yao ili waweze kupata mazao bora ambayo yataleta ushindani sokoni na kwamba hivi Sasa mpango serikali nikuwataka wawekezaji kununua  moja kwa moja kutoka kwa mkulima ili anufaike moja kwa moja.

Kwa upande wake Mtaalamu na mwenyekiti wa Chama cha Wakulima wa Parachichi Tanzania  Rebecca Hepelwa amesema wameamua kutoa elimu kwa wakulima juu ya utunzaji Wa maua na matunda kwani  hatua ya maua ndiyo hatua muhimu kwenye zao la parachichi itakayomsaidia mkulima kupata tija kwenye kilimo cha parachichi.

Wakulima Hao pia wameelimishwa dawa sahihi za kutumiwa na wakati wakuzitumia huku akitoa angalizo kwa wakulima kuotumia dawa zakuulia wadudu kiholela wakati wa maua kwani wadudu wengi kipindi hicho wanakuwa wanafanya shughuli ya uchavushaji.

Mafunzo hayo yaliyofanyika katika ukumbi wa Halmashauri ya mji Njombe yaliwajumuisha wamiliki, wakulima na wasimamizi  wa mashamba ya parachichi na yalihitimishwa kwa washiriki hao Kujifunza kwa vitendo kwenye shamba la mfano lilipo kwenye viwanja vya Halmashauri ya Mji Njombe