FIDIA MILIONI 144.8 MRADI WA MAJI NJOMBE YAKAMILIKA

Tarehe iliyowekwa: March 6th, 2024

Serikali ya Jamhuri ya Muunganio wa Tanzania kupitia Wizara ya Maji Machi 06,2024, imekamilisha zoezi la ulipaji wa fidia ya shilingi milioni 144.8 kwa wananchi waliotoa maeneo yao yenye ukubwa wa jumla ya hekari 6.06 kwa ajili utekelezaji wa mradi mkubwa wa maji wa miji 28, utakaotekelezwa katika Halmashauri ya Njombe kata ya Mjimwema ,mtaa wa Lunyanywi kwa kutumia chanzo cha maji cha mto Hagafilo.

Akizungumza wakati wa makabidhiano ya hundi za malipo hayo Katibu Tawala Wilaya ya Njombe Bi. Agatha Mhaiki ametoa shukrani dhati na pongezi kwa Serikali ya awamu ya sita inayoongozwa na Mheshimiwa Rais Dkt.Samia Suluhu Hassan kwa kufanikisha zoezi zima la fidia pamoja jitihada zinazofanyika chini ya Wizara ya Maji na dhamira yake ya kumtua mama ndoo kichwani  kwa kumaliza kabisa tatizo la maji nchini.

Aidha amewataka wananchi hao  kutumia vizuri fedha waliyopatiwa kufanya maendeleo na kutafuta maeneo mengine ya makazi badala yakuzitumia kwenye mambo ya anasa.

Kwa upande wake diwani wa Kata ya Mji Mwema Mhe. Nestory Mahenge amesema uongozi wa kata upo tayari na kwa kushirikina na wananchi watatoa ushirikiano wa hali ya juu kwa kipindi chote cha utekelezaji wa miradi huo ili kuhakikisha mradi huo unakamilika kwa wakati.

Mradi wa maji wa miji 28 Mjini Njombe  utagharimu dola za kimarekani milioni 15 ambazo zitajumuisha; ujenzi wa tegeo la maji,ujenzi wa njia kuu ya maji yenye urefu wa kilomita 2.5,ujenzi wa mtambo wa kusafisha na kutibu maji,ujenzi wa tenki la maji  lenye ujazo wa lita milioni 1 pamoja na kilomita 40 za mabomba yakusambaza maji.

Mradi huo unatarajiwa kutekelezwa  kwa kipindi cha miezi 30 na kukamilika kwa mradi huo kutawezesha upatikanaji wa maji ya uhakika katika maeneo mbalimbali ya Mji wa Njombe ikiwemo Lunyanywi,Mjimwema,Msete,Ngalanga,Stendi mpya ya mabasi,Wende na Hagafilo.