HALMASHAURI YA MJI NJOMBE NA KASI YA KIDIGITALI KATIKA KUPANGA,KUPIMA NA KUMILIKISHA ARDHI

Tarehe iliyowekwa: May 19th, 2022

Halmashauri ya Mji Njombe leo imepokea kifaa cha kisasa cha upimaji ardhi na viwanja chenye thamani ya shilingi milioni 42 ambapo kifaa hicho kitatumika katika kuongeza kasi ya upimaji viwanja na uthibiti wa makazi holela, chanzo cha fedha ikiwa ni mkopo kutoka Wizara ya ardhi,nyumba na maendeleo ya makazi lengo kuu ikiwa ni  kupanga,kupima na kumilikisha.

Akizungumza mara baada ya kupokea kifaa hicho kwa niaba ya Mkurugenzi, Kaimu Mkuu wa Kitengo cha Ardhi Amos Luhamba amesema kuwa kifaa hicho kiitwacho “KOLIDA 58Plus” kinakwenda kutatua changamoto ya Halmashauri kutumia fedha kukodi vifaa vya upimaji kutoka Taasisi binafsi na pia kutatua changamoto kubwa ya upimaji  ardhi na viwanja katika Halmashauri kwani  kifaa hicho kilikuwa kinapatikana katika Ofisi za ardhi Mkoa pekee na na  kutumika katika Halmashauri zote 6 za Mkoa wa Njombe kutoa huduma za upimaji na hivyo kupelekea kushindwa kufanya kazi za upimaji kwa wakati kutokana na kuwa na upungufu wa vifaa hivyo.

“Kama Halmashauri tuliona kupitia progaramu ya Wizara ya Ardhi ya Kupanga, Kupima na Kumilikisha ni vyema kununua kifaa ambacho kinauwezo wa kupima viwanja vingi  kwa wakati mmoja ili kuweza kuwa na maeneo mengi yaliyopimwa na kupangwa na pia kuweza kuwamilikisha Wananchi maeneo yao.Ujio wa kifaa hiki  utasaidia kuwa na makazi bora yaliyopangwa na kuepusha makazi holela ambayo hayana huduma za kijamii.”Alisema AmosAliendelea kusema” Naishukuru Wizara ya Ardhi na Wizara ya fedha kwa kutupatia fedha hizi kwani hatua ya ununuzi wa kifaa hiki pia ni katika kuhakikisha kuwa utekelezaji wa Ilani ya Chama Cha Mapinduzi ambayo inaelekeza kwenye kupanga,kupima na kumilikisha ardhi kufikia mwaka 2020- 2025  na sisi tunakwenda kutekelza kwa vitendo na kwa kasi kubwa.”Alisema

Katika hatua nyingine rai imetolewa kwa Wananchi na Taasisi mbalimbali kuhakikisha kuwa wanachangamkia fursa ya uwepo wa kifaa hicho kwa ajili ya kupimiwa maeneo yao. Aidha wamiliki wa Taasisi wanaopenda kupima maeneo yao wameshauri kutumia fursa hiyo kwani gharama za ukodishaji kwa wenye taasisi zitakuwa ni gharama nafuu.Zoezi la upangaji, upimaji na umilikishwaji ardhi lina faida nyingi ikiwa ni pamoja na  Mwananchi kuwa  na usalama wa umiliki wa ardhi, kusaidia mpangilio wa makazi bora na usalama wa ardhi kwa kuwa na nyaraka muhimu za umiliki na hivyo kuepuka migogoro ya ardhi inayoweza kujitokeza .