KAMPENI TOKOMEZA UDUMAVU KATA YA NJOMBE MJINI YAANZA KWA KISHINDO - WANANCHI WAASWA KUZINGATIA LISHE BORA KWA WATOTO.

Tarehe iliyowekwa: November 24th, 2023

Wananchi wa kata ya Njombe mjini wametakiwa kulima mbogamboga katika maeneo ya makazi yao  na kuzingatia Lishe bora  yenye mchanganyiko wa  makundi yote matano ya chakula.

Wito huo umetolewa Novemba 24,2023 katika mitaa mitatu ya Njombe Mjini ambayo ni Mtaa wa Posta, Mtaa wa Sido na Buguruni ambapo Bwana .Enos Lupimo Mtendaji wa Kata ya Njombe Mjini amesema hali ya udumavu Mkoani Njombe  ni mbaya ambapo asilimia 50% ya watoto wamedumaa  kutokana na kutopata lishe bora.

Bwana Lupimo ameomba wazazi na walezi wote kuhakikisha lishe bora  ili kuweza kutokomeza udumavu kwa  Mkoani Njombe

Sambamba na hilo Bw. Lupimo ameshauri  kupanda miche kuanzia miti miwili ya parachichi na kupanda mbogamboga katika maeneo ya makazi yao.

Naye Tumani Mtewa Diwani wa viti maalumu kata ya Njombe Mjini amewaomba wanawake mkoani Njombe kutotumia muda mwingi katika kazi zao badala yake wajikite katika malezi ya Watoto kwa kuzingatia maelekezo ya wataalamu wa lishe.

Kwa upande wake Polisi wa kata kaya Njombe mjini Florida Kiecha amewataka wazazi kujenga urafiki na watoto ili kupata taarifa endapo mtoto atafanyiwa ukatili wa kijinsia pamoja na kuwapa malezi bora.

Kauli mbiu ya kutokomeza udumavu katika kata ya Njombe mjini inasema“afya yangu ,lishe yangu lishe yangu afya yangu”