KATIKA KUONGEZA UFANISI KATIKA UTENDAJI KAZI HALMASHAURI YA MJI NJOMBE IMEWAPATIA MAFUNZO WENYEVITI WA MITAA NA VIJIJI WOTE NDANI YA HALMASHAURI

Tarehe iliyowekwa: October 21st, 2022

Mnamo tarehe 21 Oktoba 2022,Halmashauri ya Mji Njombe kwa kushirikiana na Wakufunzi  kutoka Ofisi ya Rais TAMISEMI iliandaa mafunzo kwa Wenyeviti wote wa Mitaa na Vijiji ndani ya Halmashauri kwa lengo la kuwakumbusha majukumu yao pamoja kuongeza ufanisi katika utendaji wa majukumu yao ya kila siku.

Akizungumza wakati wa Mafunzo hayo Mkurugenzi wa Halmashauri ya Mji Njombe Kuruthum Sadick amewataka Wenyeviti kuhakikisha kuwa wanayatumia mafunzo hayo kurekebisha pale ambapo walikuwa wanakosea pamoja na kuongeza ufanisi zaidi kwenye utekelezaji wa majukumu yao ya kila siku.

Kuruthum alisema kuwa Wenyeviti wa Mitaa na Vijiji ni kiungo muhimu katika maendeleo ya Halmashauri kwani wao ndio wenye watu na hivyo ni vyema kutumika vyema katika kuhakikisha jamii inakua na uelewa wa miradi inayotekelezwa katika Vijiji na Mitaa yao pamoja na kuwa washauri wema wa masuala mbalimbali wanayopelekewa mezani kwao badala ya kuwa wachochezi na wasababishi.

Akifungua mafunzo hayo Mwenyekiti wa Halmashauri ya Mji Njombe Erasto Mpete amewasihi Wenyeviti kuzingatia yale watakayokuwa wamefundishwa na kuyatumia mafundisho hayo kuleta mabadiliko chanya ndani ya Halmashauri na katika utendaji kazi.

Kwa upande  wake Mwenyekiti wa Mtaa wa National Housing  Malaki Mwandila amesema kuwa wanaishukuru Halmashauri kwa kuwaandalia mafunzo hayo ambayo yatawakumbusha wajibu wao na pia kuwaongezea ufanisi katika kuwahudumia Wananchi

Ikumbukwe kuwa Halmashauri ya Mji Njombe kupitia Idara ya Utumishi na Utawala imekua ikiandaa mafunzo kwa makundi mbalimbali ambapo awali yalifanyika mafunzo ya Madiwani kwa lengo la kuongeza ufanisi na kukumbusha wajibu na majukumu yao katika utekelezaji wa kazi zao.