KIJANA ISMAIL KINUMBI ANAHITAJI MSAADA KUJENGEWA NYUMBA YA KUISHI

Tarehe iliyowekwa: August 18th, 2023

Wadau mbalimbali wameombwa kujitokeza kusaidia ujenzi wa nyumba ya kuishi familia ya kijana muhitaji ambaye ni mlemavu Ismail Rashid Kinumbi ili kuwatoa kwenye adha wanayoipata kwenye nyumba za kupanga.

Rai hiyo imetolewa na mkuu wa wilaya ya Njombe Mhe. Kissa Gwakisa Agosti 17,2023 wakati alipomtembelea kijana huyo nyumbani anapoishi kumjulia hali na kumkabidhi baadhi ya mahitaji yaliyotolewa na wadau pamoja nakuona hatua zilizofikiwa kwenye ujenzi wa nyumba kwa ajili ya hiyo.

Mhe Kissa ametumia fursa hiyo kuwashukuru wadau mbalimbali waliojitoa kwa nyakati tofauti akiwepo Mkurungenzi wa Halmashauri ya Mji Njombe Ndugu Kuruthum Sadick kwa kuhakikisha kijana Ismail anapata bima ya afya, kiti mwendo (wheelchair) pamoja na mahitaji mengine muhimu kulingana na hali yake ikiwemo diapers za kumsitiri na chakula.

Aidha ametumia fursa hiyo kuwaomba wananchi na wadau wengine walioweka ahadi za kumsaidia kijana huyo kuhakikisha wanazitimiza ili ujenzi wa nyumba yakuishi familia hiyo uendelee na kukamilika kwa haraka.

Mhandisi wa ujenzi Halmashauri ya Mji Njombe Bernadetha Mihambo amesema ujenzi wa nyumba hiyo unatarajia kutumia kiasi cha shilingi milioni 29,000,000/= akiomba wananchi kujitoa kwa moyo ili ujenzi wa nyumba hiyo uweze kukamilika.

Kwa upande wake mama mzazi wa kijana Ismail Bi Shakira Ngonyani ametoa shukrani zake za dhati kwa wale wote waliojitokeza kuchangia mpaka kukamilisha hatua ya ujenzi wa msingi wa  nyumba ,kisima pamoja na uzio.

Kwa yeyote anayeguswa kuchangia ujenzi wa nyumba yakuishi kijana Ismail Kinumbi,michago yote inapokelewa na Afisa Ustawi wa Jamii Halmashauri ya Mji Njombe  Petro Mahanza kwa nambari ya Simu 0767 - 300801.