MAADHIMISHO YA SIKU YA WATOTO NJITI YAFANYIKA KIBENA HOSPITALI

Tarehe iliyowekwa: November 17th, 2024

Na.Ichikael Malisa. 

TAREHE 17,Novemba 2024 Halmashauri ya Mji Njombe imeadhimisha Siku ya Watoto Njiti duniani kwa mara ya kwanza, ikiwa ni juhudi za kuhamasisha na kutoa elimu kwa jamii kuhusu umuhimu wa kuwajali na kuwaheshimu watoto wanaozaliwa kabla  ya kutimiza wiki 37 za ujauzito (njiti) na wenye uzito pungufu. 

Akizungumza wakati wa Hafla hiyo iliyofanyika katika hospitali ya Mji Njombe Kibena ,Mganga Mfawidhi wa Hospitali hiyo Dr. Ayub Mtulo,alisema lengo la kufanyika maadhimisho hayo ni kutoa elimu kwa jamii kuhusu watoto njiti na haki zao. 

"Lengo la maadhimisho haya ni kutaka jamii  kutambua kuwa watoto njiti wapo na wanaishi. Lazima tuwaheshimu, tuwatunze, na kuwathamini. Pia, tunatoa elimu kwa jamii kuhakikisha kuwa hakuna unyanyapaa dhidi ya akinamama wanaojifungua watoto njiti." 

Alitoa wito kwa wazazi hasa wanaume kuachana na dhana potofu kuhusu watoto njiti akiwataka wanaume na akina mama  kushirikiana katika malezi ya watoto hao ili kufanikisha ukuaji wao. 

Aidha, alieleza kuwa hospitali Mji Njombe Kibena  imepiga hatua kubwa katika kuboresha huduma kwa watoto njiti. 

“Hospitali yetu ilikuwa na chumba kidogo sana. Lakini sasa tuna jengo jipya linalokidhi vigezo vyote,  vifaa vya kisasa na kwa umuhimu wa watoto hawa tumeweka wataalamu wa kutosha ambao wanahudumia kitengo cha watoto njiti peke yake tofauti na mwanzoni. Malengo yetu ni kupunguza vifo vya watoto wachanga na watoto njiti.” 

Alisisitiza jamii kuwajali wajawazito, kuwahimiza kuhusu lishe bora, na kuhakikisha wanapata huduma bora kabla, wakati, na baada ya kujifungua. 

Maadhimisho ya siku ya watoto Njiti dunia 2024 yameongozwa na kaulimbiu inayosema, Kitendo kidogo,matokeo makubwa ikielezea umuhimu wa wazazi kutumia njia ya Kangaroo kusaidia ukuaji wa watoto Njiti.