MAFUNZO KWA MAAFISA TARAFA NA WATENDAJI WA KATA NJOMBE YATAMATISHWA NA MKUU WA MKOA NJOMBE ANTONY MTAKA.

Tarehe iliyowekwa: June 8th, 2023

Mafunzo kwa maafisa tarafa na watendaji wa kata mkoa wa Njombe  yamemalizika kwa nasaha za utendaji kazi bora kutoka kwa Mkuu wa mkoa wa Njombe Mhe Antony Mtaka.

Mkuu wa Mkoa Mtaka amezungumza na watumishi hao wakati akifunga mafunzo yaliyo andaliwa na Ofisi ya Rais Tawala za mikoa na Serikali za mitaa(TAMISEMI),Akiwataka Maafisa na Watendaji hao kwenda kuwajibika na kusimamia vema fedha za serikali kwakufuata   sheria na miongozo mbalimbali ya serikali katika utendaji wao wa kazi.

"Miradi ya serikali ambayo ipo maeneo yenu tunaomba tukaone mabadiliko chanya kwasababu mafunzo yameshatolewa na tunategemea usimamizi mzuri katika katika miradi na ufuatiliaji katika maeneo yenu ili tuweze kupata matokeo mazuri ya serikali."

Akizungumza kwa niaba ya waliohudhuria mafunzo hayo Katibu tarafa ya Lupalilo Augustino Ngailo amesema wanamshukuru Mhe.Rais Samia Suluhu Hassan kwa kuwezesha mafunzo hayo kutolewa ili kwenda kuwasaidia kuboresha utendaji wa kazi za serikali  kwa kiasi kikubwa hasa katika kuhakikisha serikali inapta  mapato mengi na kwa usimamizi mzuri wa sheria za nchi.

''Kwa mafunzo ambayo tumeyapata tumekuwa wapya , tunakuhakikishia Mkuu wa Mkoa kuwa  tunakwenda kufanya kazi na sio kwa mazoea tena, hatutaiangusha serikali katika hili  tunakwenda kufanya vizuri zaidi."

Kwa upande wake Mkurugenzi wa sera na mipango kutoka Ofisi ya Raisi Tawala za Mikoa na Serikali za Mitaa (TAMISEMI) John Cheyo amesema dhumuni la kuamua kufanya mafunzo hayo ni  kutokana na  changamoto nyingi za kiutendaji wanazokutana nazo watumishi zinazotokana na kukosekana kwa uelewa wa kina wa taratibu na miongozo ya utendaji kazi.

Mafunzo hayo yalifanyika kwa siku mbili(2) kuanzia  Tarehe 7 Juni 2023 na kutamatika Tarehe 8,Juni 2023 katika ukumbi wa Halmashauri ya Mji Njombe.