MASHAMBA YALIYOKUWA YANAMILIKIWA NA NJORECU KUPIMWA UPYA

Tarehe iliyowekwa: October 27th, 2022

Waziri wa Nyumba na Maendeleo ya makazi Angelina Mabula ameagiza kuwa mashamba yaliyokuwa yamemilikishwa kwa Chama Cha Ushirika Mkoa wa Njombe (NJORECU) na baadaye Wananchi  kuyatumia mashamba hayo kuyaendeleza kwa muda mrefu, kufanyiwa upimaji upya na kukaa chini na pande zote mbili wakiwemo Wananchi wa Kijiji cha Ihanga na NJORECU ili kuona namna bora ya ugawaji wa maeneo hayo ambayo yatakuwa yamepimwa upya.

Awali akiwasilisha taarifa ya Kamati maalumu iliyoundwa kwa lengo la kutatua migogoro ya muingiliano wa kimatumizi katika Vijiji 975 Tanzania nzima Kijiji cha Ihanga Halmashauri ya Mji Njombe kikiwa ni miongoni mwa Vijiji vilivyofikiwa; Upendo Muguzi Mpima Ardhi kutoka Wizara ya Nyumba na Maendeleo ya Makazi  alisema kuwa,  Kamati hiyo ilibaini kuwa NJORECU walimilikishwa maeneo hayo tangu mwaka 1993 kwa barua ya Toleo na tangu kufanyika kwa umilikishwaji huo maeneo hayo hayakuwahi kuendelezwa  na Serikali ya Kijiji kuchukua uamuzi wa kuwagawia Wananchi.

Wakichangia katika nyakati tofauti tofauti baadhi ya Wajumbe wa Kamati hiyo na Viongozi kutoka Halmashauri ya Mji Njombe akiwemo Makamu Mwenyekiti wa Halmashauri Filoteus Mligo, Kaimu Mkurugenzi wa Halmashauri ya Mji Njombe Ester Gama amesema kuwa ni vyema  eneo hilo ambalo limebainika kuwa na ekari 244 tofauti na nyaraka za umiliki zinazoonyesha kuwa na ekari 392 sawa na ekari 968.5 kumilikishwa  kwa Wananchi wa Kijiji hicho kwani kwa muda mrefu NJORECU walilitelekeza bila kuliendeleza na hivyo kuwapasa kuomba eneo lingine kama nia yao inaendelea kuwepo.

Ziara hii ni mwendelezo wa ziara ya Mawaziri wa Wizara za Kisekta kutembelea Nchi nzima na kutatua migogoro ambapo leo wamefika katika Mkoa wa Njombe ukiwa ni Mkoa wa 22 tangu kuanza kwa ziara hiyo.Mawaziri wanaoshiriki  ni kutoka katika wizara ya Nyumba na Maendeleo ya makazi Ikiwakilishwa na Waziri wa Wizara hiyo Angelina  Mabula, Wizara ya  Kilimo na Umwagiliaji  ikiwakilishwa na Naibu Waziri Antony Mavunde, Wizara ya Mifugo na Uvuvi ikiwakilishwa na Naibu Waziri Abdallah Ulega , Wizara ya Maliasili na Utalii ikiwakilishwa na Naibu Waziri Mary Masanja, Ofisi ya Rais TAMISEMI ikiwakilishwa na Naibu Waziri David  Silinde , Ofisi ya Makamu wa Rais  Muungano na Mazingira ikiwakilishwa na Naibu Waziri Khamis Hamza Chillo na Wizara ya Maji ikiwakilishwa na  Naibu Waziri Mhandisi MaryPrisca Mahundi.