MGOGORO WA MIPAKA KISILO IHALULA WAMALIZIKA.

Tarehe iliyowekwa: July 22nd, 2024

Mgogoro wa Ardhi uliodumu kwa zaidi ya miaka 15, uliohusisha mipaka na eneo la malisho  kati ya kijiji cha Kisilo kilichopo kata ya Lugenge na kijiji cha Ihalula kilichopo kata ya Utalingolo , Julai 22, 2024 umetatuliwa baada ya wataalamu wa Halmashauri ya Mji Njombe kuonesha mipaka kwa mujibu wa ramani za upimaji kwa uongozi wa Kata za Lugenge na Utalingo na Serikali ya kijiji cha Kisilo na ihalula na kukubaliana mipaka hiyo iheshimiwe.

Katika eneo la malisho imeelekezwa wote waliovamia waondoe miti yao na eneo hilo libaki kwa ajili ya malisho.

Aidha viongozi wa pande zote mbili wamekubaliana kutumia machungio hayo kwa pamoja.( Communal land use).

Akitoa maelezo hayo Mtaalamu  wa Mipango Miji na  Kaimu Afisa Maendeleo ya Ardhi Mji wa Njombe Emmanuel Amos Luhamba  ameeleza kuwa  ni vizuri eneo hilo liheshimiwe na litumike kwa ajili ya machungio.

Kwa upande wake  Mwanasheria wa Halmashauri ya Mji Njombe Wakili Dotto Kulaba ameelekeza  kuheshimu mipaka ya vijiji hivyo na eneo la malisho.