Mkurugenzi Halmashauri ya Mji Njombe asaini Mikataba na Watendaji kupambana na Utapiamlo

Tarehe iliyowekwa: August 2nd, 2019

Akizungumza wakati wa  utiaji sahihi mikataba ya utendaji kazi na usimamizi wa shughuli za lishe kwa  Watendaji wa Kata, Mtaa  na Vijiji kutoka katika Kata 13 za Halmashauri ya Mji Njombe na Mkurugenzi wa Halmashauri, Bi. Illuminatha Mwenda Mkurugenzi wa Halmashauri amewataka  Watendaji hao kuhakikisha kuwa wanatekeleza yale yote yaliyopo kwenye mkataba huo ikiwa ni sambamba na kutoa elimu juu ya lishe na kuhimiza jamii  kulima bustani za mbogamboga, matunda na kula milo kamili ili kufikia adhma ya kuondokana na udumavu ambapo Mkoa wa Njombe unaongoza kwa asilimia 53.6.

“Akili inajengwa na Lishe bora, niwaombe Watendaji kuchukua hatua stahiki na kutekeleza wajibu. Kila mtu katika eneo lake ahakikishe kuwa lishe ni mojawapo ya agenda ya kudumu katika vikao vya Kamati ya Maendeleo ya Kata (KAMAKA).”Alisema Mwenda.

Akiwasilisha taarifa ya hali ya Utapiamlo na udumavu Mwakilishi wa Shirika la CUAMM ambao ni mmojawapo wa mdau wa mapambano dhidi ya Udumavu katika Mkoa wa Njombe, Neema Lazaro amesema kuwa  hali ya utapiamlo katika Mkoa wa Njombe ni kubwa  na kwa sasa hali ni mbaya zaidi kwa watoto chini ya miaka 5, wanawake wajawazito na akinamama wanaonyonyesha.

Neema amesema kuwa Utapiamlo unachangia maradhi, vifo na uchelewaji wa ukuaji wa mwili na maendeleo ya akili kwa watoto hali inayosababishwa na ulishaji duni,maradhi ya mara kwa mara na huduma hafifu za malezi na makuzi ya awali ya watoto wadogo.

Kwa upande wao Watendaji wa Kata ya Kifanya Ezekiel Busagala na Mtendaji wa Mtaa wa Ramadhani wao kwa upande wao wamesema kuwa watahakikisha kuwa utekelezaji wa Mkataba huo unaenda kufanyika ipasavyo na wataenda kutoa elimu kwa Wananchi ili kila Mwananchi aweze kuonjwa ni kwa namna gani swala la Utapiamlo na udumavu ni tatizo kubwa la linalohitaji jitihada za jamii katika kupambana nao.

Miongoni mwa majukumu ya msingi yaliyopo kwenye Mkataba huo kwa Watendaji wa Vijiji, Mitaa na Kata ni kuhamasisha na kuhakikisha  wanashiriki kikamilifu katika kupanga  mpango kazi wa lishe, kuutekeleza, kuufuatilia na kuhakikisha vikao vyote vya kisheria vinajadili agenda ya Lishe.

Mkataba huo utakaodumu kwa muda wa miaka mitatu na kupimwa kasi ya utekelezaji wake kila  mwaka ni mojawapo ya afua zinazotumika katika kupambana na tatizo la Utapiamlo na Udumavu Katika Halmashauri ya Mji Njombe na Taifa kwa ujumla.