MTAKA AWATAKA WANAFUNZI SHULE ZA SEKONDARI KUWA MABALOZI WA LISHE BORA.

Tarehe iliyowekwa: January 16th, 2024

Mkuu wa Mkoa wa Njombe Mhe Anthony Mtaka Januari 16,2024 wakati akizungumza na wanafunzi wa Shule ya Sekondari Lunyanywi na Mpechi, amewataka wanafunzi wote wa shule za Sekondari Mkoani Njombe ambao wanashiriki kuandaa vyakula nyumbani kuwa mabalozi wazuri wa kuhimiza lishe bora ndani ya familia. 

"Mkawe mabalozi wazuri, naamini wengi wenu mnaandaa chakula, hakikisha mnakuwa na mchanganyiko wa mboga na matunda, na wakati mwingine jiulizeni je huu mlo ni bora? Muwe na bustani nyumbani, otesha mboga na matunda, na mnapowaandalia wadogo zenu uji Hakikisheni siyo uji mtupu, uwe na maziwa, karanga na virutubisho vingine" Alisema Mhe Mtaka. 

Akiendelea kuzungumza Mhe. Mtaka amesema kuwa juhudi za Serikali ni kuhakikisha kila mwanafunzi anakuwa bora katika elimu  akiwahimiza Wazazi, walezi, walimu wa shule zote za Mkoa wa Njombe kupanda matunda,mboga mboga  Vinavyostawi katika maeneo ambayo wanaishi ili kuboresha lishe kwenye familia. 

Haya yanajiri wakati Mkoa wa Njombe ukiwa kwenye kampeni maalum ya kupambana kutokomeza udumavu kwa watoto wenye umri chini ya miaka mitano.

Kampeni hiyo imebeba kauli mbiu inayosema "Kujaza tumbo sio Lishe, Jali Unachomlisha"