NJOMBE KUNUFAIKA NA PROGRAMU YA MABADILIKO YA HALI YA HEWA IKIWA NI SEHEMU YA USHIRIKIANO ULIOANZISHWA KATI YA MJI NJOMBE NA MILTENBERG

Tarehe iliyowekwa: September 30th, 2022

Halmashauri ya Mji Njombe inataraji kunufaika na uhusiano wa kirafiki kati ya Nchi ya Ujerumani Mji wa Miltenberg na Halmashauri ya Mji Njombe ambapo   kiasi cha shilingi bilioni 4 kikitarajiwa kutolewa na Ujerumani kuwezesha  ujenzi  wa dampo kuu la kisasa.Mratibu wa programu hiyo ambaye ni Katibu Tawala Wilaya ya Njombe George Emmanuel amesema kuwa yapo maeneo mengi ambayo Halmashauri itaweza kunufaika kupitia urafiki huu endapo mradi utakaotekelezwa kwa mara ya kwanza utaakisi matumizi ya fedha na ubora wa mradi uliokubaliwa.

"Zipo Manispaa na Majiji ambayo yameanza kunufaika na mahusiano na Nchi mbalimbali.  Jiji la Dar es Salaam wao walianza na kwa sasa wanapokea miradi yenye zaidi ya bilioni 12.Hii ni kutokana na kuwa kwa jinsi walivyopokea fedha na kufanya utekelezaji wa mradi ndivyo ambavyo walivyoongezewa fedha zaidi mpaka kufikia kiwango hicho.Tunavyofanya vizuri ndivyo ambavyo tunaongezewa fedha"Alisema Katibu Tawala

Kai Struber ni Mtaalamu wa  mazingira na uhifadhi wa taka ambaye alisema kuwa Mji wao umepiga hatua kubwa hususani kwenye ukusanyaji na uhifadhi wa taka ambapo taka huanza kwa kutengenishwa kuanzia majumbani mpaka eneo la dampo kuu.Aidha amesema kuwa taka zinazozalishwa mara baada ya kutenganishwa hutumika kutengeneza bidhaa mbalimbali,kutengeneza mbolea na kuzalisha umeme.