PROGRAMU YA USHIRIKIANO KATI YA VYUO VIKUU VYA CANADA,CHUO CHA MAENDELEO NJOMBE KATIKA KUFANIKISHA NDOTO YA MWANAMKE

Tarehe iliyowekwa: November 21st, 2022

Mkurugenzi wa Halmashauri ya Mji Njombe Kuruthum Sadick leo amepokea Ugeni uliohusisha Wawakilishi  kutoka katika Vyuo Vikuu vinne Nchini CANADA, lengo ikiwa ni kutambulisha programu iitwayo “Ndoto yangu ni dhahabu” itakayowawezesha Wanawake na Vijana wa Kike kupata elimu kupitia mafunzo ya kiufundi, kukuza vipaji vyao, kujengewa uwezo juu ya usawa wa kijinsia na kukabiliana na ukosefu wa ajira.

Jacqueline Towell Meneja wa Miradi na Mahusinao ya Kimataifa  kutoka Kampasi  la  Oshawa Nchini Canada amesema kuwa Mpango huo wa uwezeshaji ufundi stadi unaotekelezwa na Umoja wa Vyuo Vikuu vya Canada Kwa kushirikiana na Wizara ya Elimu ya Sayansi na Teknolojia ya Tanzania kupitia Idara ya Elimu na Ufundi Stadi (VETA), Chuo Cha Maendeleo Njombe, Shirika la COCODA na Maafisa Maendeleo wa Halmashauri utatekelezwa kwa kipindi cha miaka 7 kuanzia mwaka 2021-2028, ambapo katika miaka 4 ya kuanza kwa programu hiyo timu ya Wataalamu kutoka Nchini Canada watashirikiana kufanya kazi kwa pamoja na kubadilishana uzoefu katika maeneo mbalimbali ikiwemo usawa wa kijinsia, haki za binadamu, mazingira, afya na usalama na  masoko.

Mkurugenzi wa Halmashauri ya Mji Njombe Kuruthum Sadick amepongeza hatua hiyo kubwa ya Kimaendeleo na amesema kuwa  programu hiyo ni muhimu hususani  kwa Vijana wa Kike  ambao walishindwa kuendelea na Shule kutokana na kupata Ujauzito na wengine sababu mbalimbali za kimaisha na kupelekea kushindwa kuendelea na mfumo rasmi wa elimu ambao kwa sasa wapo katika Vyuo hivyo vya Maendeleo. Kuruthum amesema kuwa  programu hiyo itawasaidia katika kuongeza ubunifu na ufanisi zaidi katika shughuli watakazokuwa wanazifanya kupitia programu hiyo.