PROGRAMU ZA MAZINGIRA ZILENGE KUELIMISHA JUU YA UHIFADHI WA TAKA KWA KUZITENGANISHA

Tarehe iliyowekwa: September 28th, 2022

Katibu Tawala Mkoa wa Njombe Judica Omary amesema kuwa bado elimu zaidi inatakiwa kwa Wananchi juu ya namna bora ya uhifadhi wa taka kwa kuzitenganisha na kuachana na tabia ya kuhifadhi taka zote sehemu moja.

Akizungumza wakati alipokutana na ugeni kutoka Miltenberg Ujerumani ambao ni Mji rafiki na Halmashauri ya Mji Njombe, Judica amesema kuwa ni vyema elimu  ikaendelea kutolewa na Wananchi kujengewa uwezo juu ya umuhimu  wa utunzaji wa taka kwa kuzitengeanisha kwa kuanzia katika hatua za awali kwa Wanafunzi mashuleni ili kuweza kutumia maarifa hayo majumbani kwao kwani mabadiliko hayaanzi kwa mara moja bali huanza kidogo kidogo.

“Katika muda wa siku tano ambao mtakuwa hapa Mjini Njombe natumaini mtaona hali halisi tuliyo nayo, lakini kuweza kutoa maoni na ushauri wa namna bora ya kuweza kuboresha ukusanyaji na uhifadhi wa taka ngumu katika Mji wa Njombe. Ili kupitia mradi ambao utakaoanzishwa kuona ni kwa namna gani yale ambayo hayatafanikiwa kutekelezwa kutokana na ukubwa wake yaweze kuwa ni sehemu ya mradi utakaoweza kuanzishwa ili Mji wa Njombe uweze kuwa mfano  bora kwenye uhifadhi na utunzaji wa mazingira.”Alisema Judica

Katika hatua nyingine Judica amesema kuwa changamoto nyingine ni kuwa katika kipindi cha kiangazi kumekuwa na moto ya mara kwa mara inayosababisha kuungua kwa misitu na hivyo kupelekea uchafuzi wa mazingira ambapo licha ya kuwa Mkoa,Wilaya na Halmashauri zimeweka sheria   mbalimbali za usimamizi wa maandalizi ya mashamba ambapo bado Wanananchi wamekuwa na muitikio wa kulega lega kwenye utekelezaji wa sheria za uhifadhi na ulinzi wa mazingira