RC MTWARA APONGEZA UBUNIFU WA MKOA WA NJOMBE UTOAJI ELIMU YA MAJANGA YA MOTO

Tarehe iliyowekwa: November 13th, 2022

Mkuu  wa  Mkoa wa Mtwara  Kanali Ahmed Abasi  amepongeza hatua ya  Mkoa wa Njombe kutoa elimu kwa njia ya mabango kuhusu athari na uthibiti wa moto kichaa janga ambalo linapoteza mabilioni ya uchumi wa Wananchi Mikoa ya kusini ikiwa miongoni mwa waathirika wakubwa.

Kanali Ahmed  amesema hayo wakati alipotembelea  banda la Mkoa  wa  Njombe na  kuangalia shughuli za utalii zinazofanyika Mkoani humo wakati wa  maonesho  ya utalii kusini; Mkoa wa Njombe ukiwa miongoni mwa washiriki.

“Niwapongeze sana kwa hatua hii ya kutembea na mabango kwa ajili ya kutoa elimu kwa jamii kuacha uchomaji wa misitu.Tumekuwa waathirika wakubwa wa matukio ya moto yanayotokea  katika Mikoa yetu na kupoteza uchumi wa mikoa hiyo kutokana na janga la moto. Niwapongeze kwa ubunifu huu wa kuendelea kutoa elimu kwa jamii” Alisema Kanali Ahmed 

Aidha  Kanali Ahmed amesema kuwa elimu ya majanga ya moto ni muhimu kuendelea kutolewa katika maeneo mbalimbali ili jamii iweze kuwa na uelewa juu ya athari zitokanazo na janga hilo.