TUWASAIDIE WENYE UHITAJI

Tarehe iliyowekwa: October 6th, 2022

Mkurugenzi wa Halmashauri ya Mji Njombe Kuruthum Sadick leo amekabidhi fimbo nyeupe  ya kutembelea kwa Kijana Sebastiani  Kilasi ambaye ni Mwanafunzi wa Chuo Kikuu cha Iringa mwenye matatizo ya ulemavu wa macho.

Akizungumza mara baada ya kukabidhiwa fimbo hiyo maalumu,Sebastian Kilasi mwenye ulemavu wa macho amesema kuwa changamoto aliyokuwa nayo awali ambayo ilimpasa mara nyingi kuongozana na mtu kwa msaada kwa sasa itakwenda kupungua kwa kiasi kikubwa kutokana na uwepo wa fimbo hiyo maalumu kwa walemavu wa Macho.

"Nashukuru sana kwa msaada huu na hata niwapo chuoni ntakua katika mazingira mazuri ya kutokuwa tegemezi, ninapotaka kutembea kutoka  sehemu moja kwenda nyingine, kwenye vivuko na pia kuwa na pia kujipangia muda wangu vizuri wa kujisomea badala ya kusubiria ratiba za wenzangu."Alisema Kilasi.

Kwa upande wake Mkurugenzi wa Halmashauri ya Mji Njombe Kuruthum Sadick ametoa rai kwa jamii kuendelea kusaidia wale wote wenye mahitaji mbalimbali kwenye jamii kwa kuwajali ili nao waweze kujiona sehemu ya  jamii.

Afisa Ustawi Halmashauri ya Mji Njombe Petro Mahanza amesema kuwa Mpaka sasa Halmashauri imenunua vifaa mbalimbali zikiwemo fimbo nyeupe kumi,baiskeli za walemavu,magongo ya kutembelea walemavu,mafuta kwa wenye ulemavu wa ngozi (albino) ambavyo vifaa hivyo vinagharimu zaidi ya shilingi milioni tatu ikiwa ni sehemu ya mapato ya ndani ya Halmashauri