UJENZI WA BARABARA ZA LAMI KWENYE MITAA MBALIMBALI YA HALMASHAURI YA MJI NJOMBE UKIWA UNAENDELEA

Tarehe iliyowekwa: November 25th, 2022

Mwenyekiti wa Halmashauri ya Mji Njombe Erasto Mpete ametembelea katika mitaa mbalimbali Mjini Njombe na kujionea shughuli za ujenzi  wa barabara kwa kiwango cha lami zinazofanywa na Wakala wa Barabara Mijini na Vijijini TARURA na kuwataka kuharakisha ujenzi huo kabla ya kipindi cha mvua kuanza.

Mpete amepongeza TARURA kwa upande wa Halmashauri ya Mji Njombe na kusema kuwa  kwa sasa wanafanya ujenzi wa miradi ya barabara kwa kiwango cha lami katika Mitaa mbalimbali jambo ambalo litasaidia kupunguza changamoto ya ubovu wa barabara na  pia kupunguza vumbi lililokuwa likiwatesa Wananchi ambao makazi au biashara zao zipo pembezoni mwa barabara ambao walikuwa wakipata kero kubwa.

Aidha katika hatua nyingine Mpete amewasihi Wananchi kuhakikisha kuwa wanatunza mitaro na kusafisha mitaro ambayo inajengwa pembezoni mwa barabara hizo badala ya kutumia mitaro hiyo kutupa taka na kuhifadhi taka jambo ambalo linasababisha kuziba na kushindwa kupitisha maji kipindi cha mvua na kupelekea maji kupoteza mweleko na kuingia kwenye makazi ya watu.

Kwa upande wake Meneja TARURA Wilaya ya Njombe Safari Alex amesema kuwa kwa upande wao watahakikisha wanaendelea kufanya usimamizi wa karibu katika miradi hiyo ya barabara ili ikamilike kwa ubora na kwa wakati.