UWANJA MKUBWA WA NDEGE KUJENGWA NJOMBE

Tarehe iliyowekwa: October 28th, 2023

Makamu wa Rais wa Jamhuri ya Muungano wa Tanzania Mheshimiwa Dkt Philip Isdor Mpango, amesema  serikali imepanga kujenga uwanja mkubwa wa ndege  Mkoani  Njombe. 

Mheshimiwa Mpango ametoa kauli hiyo ya serikali Oktoba 28,2023 wakati akihitimisha maonesho ya nne ya Shirika la kuhudumia Viwanda Vidogo SIDO yanayofanyika kitaifa mkoani Njombe.

Amesema serikali inatambua fursa mbalimbali zilizopo  mkoani Njombe na umuhimu  wa usafiri na usafirishaji hivyo serikali imeamua kujenga uwanja mkubwa wa kisasa wa ndege Mkoani Njombe. 

Mheshimiwa makamu wa Rais amesema kuwa ujenzi wa uwanja wa ndege Njombe utahusisha  ujenzi njia ya kurukia ndege yenye  urefu wa kilometa Tatu (3), Jengo kubwa la abiria na Jengo maalumu kwa ajili yakuhifadhi bidhaa zinazoharibika haraka.  

"Sisi serikali tunaamini uwepo wa usafiri wa uhakika utachangia kuinua na kukuza uzalishaji viwandani na mashambani lakini pia kuinua sekta ya utalii mkoani Njombe."Alisema Mheshimiwa Mpango. 

Uwanja wa ndege utakao jengwa mkoani Njombe utakuwa na uwezo wa kupokea ndege kubwa za abiria pamoja na ndege za mizigo.