WANAWAKE NJOMBE MJINI WAFANYA JAMBO KWA WAHITAJI.

Tarehe iliyowekwa: March 7th, 2024

Wanawake Mjini Njombe kwa kushirikiana na Ofisi ya Mkurugenzi Halmashauri ya Mji Njombe Machi 07,2024 wameadhimisha siku ya wanawake duniani  kwa kutembelea wafungwa katika gereza la Wilaya ya Njombe na watoto wenye mahitaji maalumu katika shule ya msingi Kibena.

Mkuu wa Idara ya Maendeleo ya Jamii Bi.Enembora Lema ameeleza kuwa maadhimisho ya siku ya wanawake duniani kwa Halmashauri ya Mji Njombe mwaka 2024 yalilenga kuwagusa wahitaji kwa kuwapelekea mahitaji ya msingi kwa matumizi yao ya kila siku na kuboresha mazingira yao yakuishi.

Aidha amewashukuru wanawake wote pamoja na wadau mbambali kwa namna walivyojitolea kwa hali na mali kufanikisha kupata mahitaji muhimu kwa maeneo yote mawili.

Akizungumza baada yakukabidhiwa zawadi ambazo zilihusisha vifaa vya ujenzi ,Mkuu wa gereza la Wilaya ya Njombe Mrakibu wa Magereza JY. Njaidi amewashukuru wanawake na wadau wote kwa kuona umuhimu wakuwatembelea  wafungwa gerezani hapo,aidha amwetoa  wito kwa wananchi wengine kuwatembelea  walio gerezani jambo alilosema ni faraja kwao kama sehemu ya jamii.

“Mmetuheshimisha sana na hii inaonesha umuhimu wa mwanamke kwenye jamii ,niseme tuu sisi tupo kwa yeyote atakayeguswa kuja kufanya tendo la huruma tunamkaribisha sana”.Alisema Mrakibu JY.Njaidi.

Naye Mkuu wa Shule ya Msingi Kibena Mwalimu Selestina Tembo amesema mahitaji yaliyowafikia yalikuwa ya muhimu sana kituoni hapo na yataenda kupunguza baadhi ya changamoto walizokuwa nazo.Amewaomba wadau zaidi kujitokeza kutembelea kituo hicho nakuwasaidia watoto hao ambao wanalelewa bila gharama kituoni hapo.

“Vitu vyote mlivyovileta leo ni muhimu na tulivihitaji sana ,tunashukuru kwa namna mlivyoweza kuhamasishana na kuleta vitu vyote hivi.”Alisema Mwl.Selestina.

Kilele cha maadhimisho ya siku ya wanawake duniani Machi 08,2024 kitafanyika kimkoa katika Wilaya ya Wanging’ombe.Maadhimisho ya siku ya wanawake duniani 2024  yanaambatana na kaulimbiu isemayo “Wekaza kwa wanawake kuharakisha mendeleo ya Taifa na Ustawi wa Jamii.”