WAZAZI ZINGATIENI LISHE BORA KWA WATOTO.

Tarehe iliyowekwa: June 13th, 2023

Wazazi na walezi mkoani Njombe  wametakiwa kutoa kipaumbele kwenye suala la lishe bora ili kuondokana na udumavu.

Rai hiyo imetolewa na Kaimu Mganga Mkuu wa Mkoa wa Njombe Dkt. David Ntaindwa aliyemwakilisha Mganga Mkuu Mkoa wa Njombe katika maadhimisho Siku ya Afya na Lishe  yaliyofanyika  June 12,2023  Kata ya Ramadhani  iliyopo Halmashauri ya Mji Njombe.

Dkt Ntaindwa amewasihi  wazazi na walezi kuhakikisha wanazingatia makundi yote ya vyakula bora kwa watoto ili kuepukana na changamoto ya udumavu.

"Siku hii ya Afya na Lishe inatukumbusha wajibu wetu kama wazazi na walezi kuzingatia afya zetu na matumizi ya lishe bora kwa watoto, tunaamini  elimu ya lishe ambayo imetolewa na wataalamu wa afya itaenda kuwasaidia katika kuanda  vyakula bora kwa watoto wetu ili tuepukane na udumavu katika mkoa wetu"

Kwa upande wake Diwani Kata ya Ramadhani Mhe.Nickson Nganyage amewatahadharisha  wazazi kutotumia muda mwingi katika shughuli binafsi za kijamii na kiuchumi  baadala yake wajikite katika malezi ya watoto ili kupunguza changamotoya udumavu katika mkoa wa njombe .

Aidha Afisa Lishe Mkoa Njombe Betha Nyigu amewaomba wazazi kuhakikisha wanazingatia maelekezo ya wataalamu wa afya na kuhakikisha wanawapa watoto kipaumbele kama wanavyo tumia muda mwingi katika kazi zao.