Maandalizi ya kuhamia Soko jipya Njombe yaanza

Tarehe iliyowekwa: December 12th, 2020

Halmashauri ya Mji Njombe imeanza vikao vya awali ikihusisha Wadau wa Maendeleo na Wafanyabiashara kutoka soko la Dodoma lengo ikiwa ni kupata maoni  ya utaratibu wa kurejea  katika Soko jipya ambalo ujenzi wake umekamilika.

Akizungumza wakati kikao hicho Mkuu wa Wilaya ya Njombe Ruth Msafiri amesema kuwa vikao vya wadau na Wafanyabiashara juu ya ufunguzi wa soko jipya ni muhimu kwani vitasaidia kupata mawazo chanya yatakayoleta maendeleo na pia kurahisisha utendaji kazi kwa usahihi katika soko hilo.

“Mawazo tutakayopata yatasaidia katika kuboresha Ufunguzi wa soko jipya la Njombe. Inabidi tutambue kuwa uwepo wa soko utawezesha kuboresha maisha na pia litasaidia kukuza sekta nyingine na ni vyema wafanyabiashara kutumia soko la Njombe kukuza biashara zao.Wapo wanaobeza mchakato wa uanzaji wa soko kuwa  taratibu hazikufuatwa.Naomba niwatoe shaka taratibu zote zitafuatwa kwa kadri ya makubaliano ambayo tutakuwa tumeyaafiki pande zote ”Alisema Mkuu wa Wilaya.

Bi Ruth amesema kuwa kuwa mpango wa uendeshaji wa huduma za soko ni kuhakikisha kuwa huduma inapatikana kwa masaa 24 tofauti na hali ya sasa ambapo mwisho ni saa kumi na mbili nusu jioni na hivyo kuwataka wafanyabiashara kujiandaa kwa hilo.

Akiwasilisha taarifa ya soko kwa Niaba ya Mkurugenzi wa Mji Njombe Afisa Mifugo wa Halmashauri Thadei Luoga amesema kuwa Halmashauri imejipanga kikamilifu kuhakikisha kuwa tarehe 20/12/2020 awamu ya kwanza ya wafanyabiashara inaanza kuingia sokoni ikifuatiwa na awamu ya pili tarehe 23 na uzinduzi wa soko utafanyika kwenye mkesha wa mwaka mpya.

Kwa upande wao Wadau wa Maendeleo na Wafanyabiashara wameipongeza Halmashauri kwa kazi kubwa ya kusimamia na kukamilika kwa soko jipya na wameomba Halmashauri ihakikishe kuwa utaratibu unafuatwa ili wafanyabiashara waweze kurudi kuendelea na shughuli zao bila ya upendeleo wa aina yoyote.

“Tunaomba katika soko jipya wafanyabiashara waelimishwe juu ya kutumia mizani, matumizi ya vifaa vya kielektroniki kwenye mabucha, usafi na usimamizi mzuri ndani ya soko. Pia tuhakikishe kuwa usafiri na ulinzi ni wa uhakikika muda wote ili soko liweze kufanya kazi masaa 24. Alisema mmoja wa wadau

Kwa sasa Halmashauri imehitimisha zoezi la kutoa fomu za maombi kwa Wafanyabiashara watakaopenda kufanya biashara katika soko jipya zoezi lililohitimishwa tarehe 11/12/2020 ambapo idadi kubwa ya Wananchi imejitokeza kufanya  maombi.