Naibu Waziri TAMISEMI apongeza ujenzi wa miradi ya Afya na Elimu Halmashauri ya Mji Njombe

Tarehe iliyowekwa: July 23rd, 2019

Naibu Waziri wa TAMISEMI  Mwita Waitara amefanya ziara ya kikazi katika Mkoa wa Njombe kwa kutembelea na kukagua ujenzi wa Kituo cha Afya Makowo na Ujenzi wa Madarasa katika Shule ya Msingi Makowo Kata ya Makowo na shule ya Msingi Kambarage zilizopo Halmashauri ya Mji Njombe ambapo serikali imetoa zaidi ya Tsh. Milioni 72.5 kufanikisha ujenzi wa vyumba vya madarasa katika shule hizo na kufurahishwa na hatua za ujenzi zinazoendelea huku akiipongeza  Halmashauri na Wananchi kwa ujumla kwa kushiriki katika utekelezaji wa miradi ya hiyo.

“Serikali imetoa fedha kwa ajili ya kuanzisha, kuboresha na kusimamia miradi ya maendeleo ili kuhakikisha kuwa kero za wananchi zinatatuliwa. Zipo Halmashauri ambazo zimekuwa zikitekeleza miradi ya maendeleo hewa. Fedha zinapelekwa katika maeneo husika lakini miradi haipo. Wakati mwingine mradi haulingani na thamani ya fedha iliyotumika. Serikali ilishatoa maelekezo kuwa fedha zinazopelekwa kwa wananchi zitumike kwa malengo ya miradi husika na ndio maana leo nimepita ili niweze kukagua na kujiridhisha. Ninayozungumza hapa si ya kwangu ni maelekezo ya Serikali na tunafanya kazi kwa niaba ya Rais lazima yale tunayofanya yaendane na matamanio na Falsafa ya Mheshimiwa Rais” Alisema Waitara

Waitara amesema kuwa Halmashauri zinapaswa kuhakikisha kuwa asilimia 40 iliyotolewa maelekezo kutumika kwa ajili ya miradi ya maendeleo inatumika ipasavyo na inapelekwa kutekeleza miradi husika na kutaka uwazi na uwajibikaji uzingatiwe katika kila hatua.

Awali akizungumza na Watumishi kutoka katika Halmashauri ya Mji Makambako, Halmashauri ya Mji Njombe na Halmashauri ya Wilaya ya Njombe, Waitara amewataka watumishi kuhakikisha kuwa wanafanya kazi kwa weledi na kuzingatia kanuni za Utumishi wa umma huku akiwataka Watumishi kuwatembelea na kutoa huduma kwa Wananchi katika maeneo yao kwa kutoka ofisini.

Aidha, katika hali isiyo ya kawaida Wananchi wa Kata hiyo wameipongeza Serikali kwa hatua ambazo imekuwa ikizichukuwa za  kuleta maendeleo na kuhakikisha kuwa viongozi wanawafikia Wananchi hata katika maeneo ya vijijini  na  Kumpongeza Naibu Waziri Waitara kwani ameweza kuvunja rekodi ya kuwa Naibu Waziri wa Kwanza kufika katika Kijiji hicho katika maisha yao yote Kijijini hapo.

“Katika maisha yetu yote hatujawahi kupokea ugeni kama huu. Wewe ni Naibu Waziri wa kwanza kufika katika Kata hii umevunja   rekodi, kwa kweli tumefarijika sana” Alisema Diwani wa Makowo Mhe. Mgaya.

Ziara ya Waitara inaendelea leo kwa kutembelea Halmashauri ya Ludewa na Makete katika Mkoa wa Njombe.